إشتعال حرب التصريحات بين محمود العسيلي وحسن شاكوش .. تفاصيل

هاجم مؤدي المهرجانات حسن شاكوش، تصريحات المطرب محمود العسيلي؛ الذي أبدى خلالها تعجبه من اعتلاء مطرب غير مشهور صدارة الأعلى استماعا بالوطن العربي، حسب تصريحات تلفزيونية.

ورد حسن شاكوش خلال لايف عبر حسابه الشخصي بموقع إنستجرام، قائلاً: مينفعش نبقى في وش بعض نتكلم بأسلوب، وفي الضهر نتكلم بشكل تاني وبطريقة تانية، أنا مبحبش البني آدم اللى كده، محمود العسيلي جالى كذا حفلة وبنزل الاستيدج وأروح أسلم عليه ده ذوقيًا، وده اللى اتربينا عليه.

وتابع حسن شاكوش: يعني أنت عرفت اسم عصام صاصا ومش عارف أغانيه، مينفعش يكون عصام صاصا تريند وأطلع أقول معرفش بيغني إيه.

وأوضح شاكوش: أقسم بالله مش عشان حاجة أنا مش حافظ أغاني لمحمود العسيلي ولا أعرفها، إحنا الحمدلله والشكر لله مسمعين وموجودين في الوطن العربي، اللى هيحترمنا هنشيله فوق دماغنا، واللى مش هيتحترمنا مش هنحترمه، مينفعش يطلع من بوقي لفظ يضايق أي حد وأنا بيسمعني عائلات وأطفال.

واختتم شاكوش: بتقول الراب كمان هينتهي، طب لما الشعبي والراب هينام مين هيبقى موجود؟ أمال مين هيرقص الناس، إحنا لازم نحترم بعضينا ونقدر بعضينا ونخاف على مشاعر بعض، أنا راجل بغني وفي سوق ووسط النجوم فلازم أكون عارف ده بيغني ايه وبيعمل إيه، عيب إنك تقول عصام صاصا ومش عارف بيغني إيه عصام صاصا؟ بيغني هندي؟ ربنا يهدي الجميع.

واستطرد حسن شاكوش: كل نجم ليه وقت، ولازم يأخد هدنة، بس لما بيرجع بيطلع حاجات هتقعدكم في بيتكم، وإحنا مجال المزيكا بتاعتنا والمهرجان والغنوة الشعبي ده مش هيموت، الناس تعبت من كتر الاكتئاب، والأغاني اللى بتجيب الاكتئاب وبتجيب ملل وبتعقد الناس.

وأضاف شاكوش: الناس ما بتصدق تسمع أغنية شعبي ليا أو لأى مطرب شعبي زي حمو بيكا وعمر كمال، وبيحبوا يسمعوا أغاني بتاعتنا عشان بنطلع الواحد من المود، أنا مثلًا كحسن شاكوش لما بسمع أغنية لشيرين عبد الوهاب أو كده ببقى عايش مود الأغنية، فبكون حزين.

وأوضح حسن شاكوش: أغاني المهرجانات مكملة، وإحنا لسه هنبتدي في حياتنا ولسه صغيرين، ومفيش واحد فينا عدي الـ 40 أو 35 سنة، وإن شاء الله مكملين في النجاح، والنجاح اللى إحنا قدمناه يشغلنا ويعيشنا 20 سنة قدام، بس إحنا مش آخرنا كده، إحنا عايزين نطّور ونجدد.

وفي سياق متصل، أكد المطرب محمود العسيلي في تصريحات تلفزيونية أسباب تراجع أغاني المهرجانات على الساحة ‏الغنائية خلال الآونة الأخيرة، قائلاً: التريند بيتغير مع الوقت.. في واحد معرفوش وعمري بحياتي ما سمعته، اسمه عصام صاصا، وهو الأكثر استماعا على ‏جميع المنصات واليوتيوب في الوطن العربي، تقريبا بيغني مهرجانات.