نبيلة عبيد: أنا نمبر وان في الستات ..وهذه الفنانة طلبت تقديم سيرتي الذاتية

أعربت الفنانة نبيلة عبيد، عن سعادتها الكبيرة بتكريمها في مهرجان البحر الأحمر السينمائي الدولي، بجانب حديثها عن لقب نجمة مصر الأولى، وتفاصيل تقديمها سيرتها الذاتية.

وقالت نبيلة عبيد في تصريحات تلفزيونية: كنت مرعوبة وأنا رايحة في الطريق علشان اتكرم، ولكن الكلام اللي اتقال خلاني سعيدة وفخورة، الفترة اللي أنا اشتغلت فيها كانت كلها عن المرأة، أنا عاملة أكثر من 90 فيلم وبدأت مع الأدباء الكبار زي محمود أبو زيد ووحيد حامد ومصطفى محرم، كل دول كانوا بيكتبوا للمرأة، فأنا كان عندي حصيلة كبيرة من أفلام المرأة، والحمد لله الناس فاكرة أفلامي وبتتكلم عليها.

وتابعت نبيلة عبيد: في بعض الأفلام عملتها في سوريا ولبنان ومعجبتش الناس، وأنا محبتش نفسي في المكان ده، وغيرت الطريق خالص وروحت لـ إحسان عبد القدوس وخدت روايات وخدت الطريق ده، أنا أفلامي كلها كانت بتجيب فلوس.

كما تحدثت عن لقب نجمة مصر الأولى، قائلة: أنا كنت مخضوضة وخايفة من لقب نجمة مصر الأولى وقولت هيقولوا عليا إني مغرورة، ولكن قالولي تستاهلي اللقب، لأن أنا كنت الأولى في البيع، وأنا مع أن محمد رمضان نمبر وان لأنه أول واحد في القائمة، هو بيبع كويس والناس بتحبه.

وأكدت الفنانة، أن المخرج من أهم عناصر العمل، موضحة: الأفلام اللي بتتعرض عليا دلوقتي بفكر أني لازم أكون في وسط شباب ولكن ببقى خايفة لأن آخر مخرج اشتغلت معاه كان سعيد مرزوق، مين هيبقى بعده؟ أنا مؤمنة بالمخرج والورق دول اللي يخلوني أقول حاضر واشتغل وأنا مرتاحة، طبعًا مش هعمل أدوار زي الأول ولكن في أم بتطلع، لازم الشخصيات تتوظف علشان يمزجوا الجيل القديم بالجديد، أنا مؤمنة بالجيل الجديد وبيعملوا حاجات حلوة.

أما عن تقديمها سيرتها الذاتية في عمل فني، فعلقت نبيلة عبيد: دينا الشربيني كانت عرضت أنها تعمل قصة حياتي، ولكن أنا اللي هعمل قصة حياتي ولكن مش دراما وأنا اللي هحكيها تفاصيل المجهود الفني، أنا كنت بتحمل كتير أوي ولما وصلت لكل ده كان بالتعب.

كما كشفت عبيد سر غيابها لمدة عامين عن الساحة الفنية.

وقالت خلال لقائها مع قناة MTV اللبنانية على هامش حضورها حفل افتتاح الدورة الثانية من مهرجان البحر الأحمر السينمائي، : "بنقي موضوعات كويسة ولازم دلوقتي أنقي موضوعات كويسه وأعمل حاجات تكون مناسبة ليا دلوقتي، وإن شاء الله ربنا يوفقني وألاقي حاجات كويسة".

وتحدثت نبيلة عبيد عن لبنان وما مر به من أحداث وقالت " بحب لبنان وربنا يشيل كل حاجة ويرد لبنان وهي ست الدنيا وترجع أحسن مما كانت وجسمي بيقشعر لما بجيب سيرة لبنان، وكلنا بنحبها.

في سياق مختلف، حضرت نبيلة عبيد حفلاً ساهراً أقيم في جدة أحيته النجمة اللبنانية نانسي عجرم، وحضره عدد من النجوم والنجمات على هامش مهرجان البحر الأحمر السينمائي.